Act 22 | BJR | STEP | Pauroofa narí máqannaasa qímannidanoo narí afaaqasáa ititéenoo maaqí qímasee qímanniminau. Óo maa-fasiqáusa qiní qíkaqaafasaa qiní qíkausamara. Ínnee qiní ufa irisáifaqa qeeqá írirana nímia.

Acts 22

1 Pauroofa narí máqannaasa qímannidanoo narí afaaqasáa ititéenoo maaqí qímasee qímanniminau. Óo maa-fasiqáusa qiní qíkaqaafasaa qiní qíkausamara. Ínnee qiní ufa irisáifaqa qeeqá írirana nímia. 2 Qaara auqu, moo áuqu Heeburu máqannaa ufa moo auqu Yuda máqannaa ufa márinau. Misá Pauroonara Heeburu máqannaa ufa nári ufa qídaqinoo fee qímasee aiqáma dái qímafiqau. Miqímambufanoo Pauroofa qímanniminoo qinau.

3 Qinée Yuda máqannaa fásiqa máridaqa Sirisia máqa maaqaki Tarasusa máqusai kambíqaafanausa máridaqa. Óoqai qinée kumaaráasaa máridaqa maa-maqusánaki Yeerusaree máqusaki Kamarieerana sukúraki kísaaqasaa máriaafanausa máridaqa. Qinée Kamarieerana sukúraki máridaqa maasá qikeekú qíkaakú sándufa ámiqimasee aiqáma iriaraasíafanausa máridaqa. Ínnee maqee Ánutunara afeekaikámándee minára rímariafaqa qinée maqee níndafaidaqa. Qinée ínni naannaréereeaafanausa máridaqa. 4 Óoqai Yísunasaa atooqéemarusa kuqá kai nári máriafánausa máridaqa. Qinée faiqí faqa ánaasee faqa rumbásee karabúsaki áqimarifanausa máridaqa. 5 Amaana máqasaa aanáiqikirausa misá úriqararafa mifá qiní ufa ánoona íridanoo. Amaana máqa kansóorauqa faqa qiní ufara kúqaa fee qifáranoo. Misá kai pása ákara rúmasee Damasakusa máqusai mária Yuda máqannaasa nímiannee qufaqa qinée mi-pasána maramáree Damasakusa máqusai óoru Yísuna ufa írimarusa rumbámaree nífiqee múqu Yeerusareenni quqáaneera óoru fúafanausa máridaqa.

Pauroofa narí Yísuna qáfoonara qímanniminau.

(Niqiqoosa 9:1-19; 26:12-18)

6 Qinée mi-pasána mara máree Damasakusa máqusa adeedí rámasaafananoo súani qámbaana márufanoo innaarúnaindari idáuru̱ káaqa qárafa qumuréenoo qiní fíqu fíqumma aiqáma rafáaqafuqisoofaqa qinée maqásaa áqufiqiafana. Innaarúnaindari ufa moó qufaqa íriqia. Sauroo Sauroo anée nánaree qiní dáriraridanee qufaqa qinée Óo Karaambáiqa anée yáfee qíafananoo mifá qinau. Qinée Yísusa Nasareeteendaraasa máridaqa. Anée dárunausa máridaqa. Miná ufa fannoo miqí qímasee qiní qímaqimufaqa qiní faqa fímarusa káaqa qárana qáfaqau ufa sía íriqau.

10 Qinée miná irámmiriqa qiqíafana Óo Karaambáiqa qinée náqi fee ianáuree qíafananoo Karaambáiqa innaarúnaindari qinau. Anée fíndifinana Damasakusa máqusaki fúa. Miqóo óonu ráinanoo faiqí moó fannoo Ánutufa qinára aní qímamiani. 11 Káaqa qarana fannoo qiní qífu dimbásoofaqa qiní faqa fusá qísauku qumároofaqa Damasakusa máqusai fiqíafana.

12 Damasakusa máqusaki faiqí moo áuqu Ananiasa Mooseena sándufamau fímarufa Yuda máqannaa miqóo márusa minára andeeqára fasiqa fée qímarufa.

13 Mifá qinée máriafannaqoo anikikíqamámbufanoo Óo Sauroo, qiní qíkaqa, anée áfu máqaa, qufanoo kai qífu maqasée miná qáfaqiafana. 14 Maasá qikeekú qikaakú Ánutufa aníara rusandeesámumandee aníara miná íriranamau fuannéera miná aináinira faiqi andeeqárana Yísuna qáfaanneera miná Yísuna ufa írianeera qinoo. 15 Pauroo anée Yísuna áfunnai qáfoonafa máriananoo minára áfu qáfoonnanara aiqámausa qímannimia áaqoo írunnara aiqámausa qímannimia. 16 Nánaree káqi máridanee dóo fíndifinana nammári máraa. Yísuna áaramásee irámmirinanoo aní mandáinaina rukáannoo.

17 Ananiasafa miqí qímasoofaqa qinée Damasakusa máqusaindari maaqóo Yeerusareenni aní máridaqa amaana máqaki innaaru qímariafananoo qífu kai pisipasamándee Karaambáiqa akooqóo qímaqiminoo qinau. Dóo káqi káqi maa-Yeerusaree maqusáindari quqásee moosáa fúa. Anée maaqóoqaraasa qiníara qímanniminaqa sía írifaqa. 19 Miqí qímaqoofaqa qinée maaqí qímamiqia. Óo Karaambáiqa qinée aní ufa írimarusa ufa suqíra maaqakiaqa kéeqafida rarisámasee náriisee karabúsaki quqée máriafanausa máridaqa. Maaqóoqaraasa minára ámiqimasee qiní óosana íridaqa. 20 Misá Seeteefeena árimarufaqa qinée faqa miqóo máridaqa dúfiaree áridee qímasee árimaru fasiqausa qamunnasaa rakísi máriafanausa máridaqa. 21 Karaambáiqa qiní mi-ufána iriséenoo qímaqiminoo qinau. Dóo anée fíndifua maaqóoqari ánaamuru níanai máriasaki aní aqiqáidaqa.

22 Pauroofa Yeerusaree máqannaasa narí sáamu uqafíqee marúsa qímannimidanoo ánaamuru núquroofaqa misá miná iriséeqa áanoomaseeqa fífau faafau ufa qíqa fáaqa quqásee mi-ufána qíma rukíaqau. Misá maaqí qiqau dóo máree múnusee miná áru áquaqa. Miná márirafa sía amana máridanoo. 23 Miqí qídaqa Yuda máqannaasa fáaqa rúmaseeqa níranaqoofaqa nári qamunna qumáreeqa minánnai rutátidaqa kookoomma afáqeeqee miná ánaamu raqau.

24 Roomma máqannaa kiatéenna fannoo narí sundíauqa maaqí qímasee qímanniminau, ínnee maa-fasiqána ínneeqa quqúsaki quqásee uaiáqa samu áriisaifanoo narí mandáinaina kooroo íani. Yuda máqannaa fáaqaruana óosana kooroo íani.

(Roomma máqannaasa máqa maaqai kambíqoosa mi-ququsánaki márunausee qímarunara sía moo súndia fee firisuaiqá fee amana kai rumbárana, árirana sía amana miná rumbéefaree árifaree. Moo máqannaasa Roomma máqannaasa rakísinnimaqee maríasa káqi rumbéefaree káqi árifaree. Moo máqannaafa firaa feefaurúmasee Roomma máqannaasa quqúsaki kéeqafifanoo mi-sandufána miná afaaqasáa ititáannoo.)

25 Sundíauqa Pauroona rumbásoofanoo uaiáqasamu árirara deedaqufanoo Pauroofa kubóora qímaminoo qinau Ínnee amanée Roomma máqannaa quqúsakinaa fasiqa árifaree, sía amana árifaree kóotaki qiní úfa sía ámiqimasee rainásee íriafanoo káqi fífau dárirari maríafanoo. 26 Kubóora fannoo iriséenoo Saidéena óonu qímamidanoo qinau. Anée sía mi-fasiqána árua. Roomma máqannaa quqúsakinaafa máridanoo, qufanoo, Saidéena iriseenoo rufíeenoo Pauroo finnái óonuree iranau. Kúqaa fee anée Roomma máqannaa ququsakinaa fee máridanee. Pauroofa eedóo qinau. 28 Saidéena kaifáa qinau. Qinée firaa munnimma áquseeqa Rooma máqannaa quqúsaki fúafanausa máridaqee qufanoo Pauroofa qinau. Sía qinée munnimma áquafánausa máridaqa qiní qíkoofa minakí márunara qinée Roomma máqannaa ququsaki kambíqarausa máridaqa.

29 Sundíauqa mi-ufána iriséeqa nísauku raqándaa mámaraqau. Saidéena faqa mi-ufána iriséenoo Óo qinée Roomma máqannaa sándufa rukíasee sía ufa írirainni sáinandannai rumbáafanausee qímasee qiní úriqararafa minára irisee qiní faqa dáruandoo qímasee naríara rufíanau.

Pauroofa Yuda máqannaasa úriqararausa nífusaa kikíqinau.

30 Saidéena fannoo Yuda máqannaasa firaaqóo amoosáu máqaranara óosana írianee qímasee iqáqoofanoo kanánaana Pauroona sáinanda idukúseenoo amaana máqa aanáiqiki márusa úriqararausa faqa misá kansóorauqa faqa náarama quqáseenoo Pauroona maréeqee misá nóorinni quqánau.